BYHome

Праект BYHome быў створаны беларуска-швейцарскай асацыяцыяй RAZAM.CH у лістападзе 2020 года.

У сувязі з сітуацыяй у Беларусі напярэдадні і пасля прэзідэнцкіх выбараў шмат людзей пацярпелі ад рэпрэсіяў і пераследу ды вымушаны былі пакінуць краіну, каб шукаць прытулку для сябе і сваіх сем’яў.

Суседняя Польшча з’яўляецца адной з асноўных краін, куды са жніўня 2020 года накіраваліся тысячы беларусаў. Колькасць прашэнняў аб палітычным прытулку з боку грамадзянаў Беларусі ў Польшчы павялічылася больш чым у 8 разоў у параўнанні з першым паўгоддзем 2020 года. Беларускія імігранты шукаюць працу і спрабуюць самастойна адаптавацца ў новых бяспечных умовах, але асабліва напачатку гэтым людзям патрэбна дапамога для аплаты жылля.

Дзякуючы рэгулярным і адзінкавым ахвяраванням праекту BYHome, мы здольныя пакрываць выдаткі на арэнду жылля для сем’яў, якія маюць патрэбу ў падтрымцы. Першапачаткова мы забяспечваем аплату арэнды на тры месяцы з магчымым падаўжэннем да шасці месяцаў – пакуль падшэфная сям’я не будзе мець ўласнага стабільнага даходу для пакрыцця выдаткаў на пражыванне.

Партнёрам праекта ў Польшчы з’яўляецца Фонд HUMANOSH. Ён здзяйсняе пошук кватэр, забяспечвае кантракты на арэнду і мэтавыя пераказы грошаў ад RAZAM.CH.

Зараз мы падтрымліваем чатыры сям’і з дзецьмі ва ўзросце ад 2 да 16 гадоў.

  • Наша першая падшэфная сям’я з двума дзецьмі з’ехала з-за некалькіх незаконных затрыманняў бацькі і пагрозы яго працяглага арышту. У хуткім часе ў іх народзіцца трэцяе дзіця.
  • Двое дзяцей з’ехалі з Беларусі разам з бабуляй, бо бацькі апынуліся за кратамі.
  • Бацькі з трыма дзецьмі былі вымушаныя з’ехаць з-за пагрозы арышту і пазбаўлення бацькоўскіх правоў.
  • Маці і яе сын пераехалі ў Польшчу пасля таго, як міліцыя ўзламала дзверы іх кватэры за ўдзел у мірнай акцыі пратэсту.

Мы маем непасрэдны кантакт з усімі гэтымі сем’ямі, таму можам неадкладна сачыць за зменамі ў іх сітуацыі і прымаць рашэнне аб працягу або спыненні падтрымкі.

Мы занепакоеныя лёсамі гэтых людзей і хочам падтрымаць іх у асабліва складаныя часы адаптацыі ў замежнай краіне.

Мы ўдзячныя за сталае апякунства і за адзінкавыя ахвяраванні.

Разам мы можам зрабіць больш!